Արվեստ Հայաստան Հիմնադրամի մեդիակենտրոն

Արվեստ Հայաստան Հիմնադրամի մեդիակենտրոնը կատալոգների, գրքերի, ամսագրերի, տեսաձայնային եւ վավերագրական նյութերի հավաքածու է, որն արտացոլում է Հայաստանի ժամանակակից արվեստի պատմությունը եւ վավերագրում է դրա ներկան: Մեդիակենտրոնը ժամանակակից արվեստի հետազոտությունների, զրույցների եւ բանավեճերի վայր է, այն տեղեկատվություն է տրամադրում արվեստագետների եւ արվեստի հետ կապված նյութերի, ինչպես նաեւ միջազգային արդի եւ ժամանակակից արվեստի պատմության եւ տեսության վերաբերյալ:

Հավաքածուն ընդգրկում է ցուցահանդեսների կատալոգներ, արդի և ժամանակակից արվեստին նվիրված գրքեր եւ ամսագրեր, ժամանակակից արվեստին առնչվող (ճարտարապետություն, թանգարանային ուսումնասիրություններ) գրքեր եւ ամսագրեր, վավերագրական նյութեր, արխիվներ, արվեստագետի գրքեր, պաստառներ, լուսանկարներ, հաշվետվություններ, բրոշյուրներ, հրավերներ, ԱՀՀ-ի աջակցած արվեստի նախագծերին առնչվող նյութեր, ամսագրեր եւ թերթեր:

Մեդիակենտրոնի հավաքածուն համալրվում է առանձին հաստատությունների եւ անհատ նվիրատուների աջակցությամբ․ ամենախոշոր նվիրատուներից է Գառաժ ժամանակակից արվեստի թանգարանը: